/ aktuelt / "Det er brei semje om å jobbe for å halde USA inne i freden i Europa"

Europa samlar seg om ei sterkare og samordna støtte til Ukraina, seier Jonas Gahr Støre etter toppmøtet i London. Han viser samtidig til kor viktig USA er.

Statsministeren beskriv møtet som godt, men alvorstungt, med den alvorlege situasjonen i Ukraina som bakteppe.

– Vi har også sett Europa i eit større format. Der er også Storbritannia, Noreg, Tyrkia og Canada. Europa samlar seg no om ei sterkare og samordna støtte til Ukraina, sa Støre.

Fred må vere varig

Storbritannia og Frankrike leier arbeidet vidare og koordinerer ifølgje Støre det som kan bli ein europeisk plan for støtte til Ukraina. Noreg skal spele inn på prosess og innhald.

– Europa samlar seg no om ei sterkare og meir samordna støtte til Ukraina, sa Støre og la til:

– Vi har aldri sett eit så djupt samarbeid mellom europeiske land.

Støre la vekt på at ein eventuell våpenkvile eller fred i Ukraina må vere varig, og ikkje berre ein pause som kan blusse opp igjen.

Samstemde om at USA må vere involvert

– Det er brei semje om å jobbe for å halde USA inne i freden i Europa, sa Støre, som vedgjekk at det har vore nokre tunge dagar i det siste.

– Det er veldig viktig at USA er med. Det er vi alle samde om. Vi skal finne ein veg med USA, og Ukraina er også oppteke av det.

Når EU-landa møtest på nytt torsdag, skal britane, Noreg og Tyrkia koplast på like etter møtet for å halde fram med å jobbe saman.

Støre møtte pressa på den norske ambassaden i London etter EU-toppmøte med Zelenskyj i London.

Statsminister Jonas Gahr Støre (Ap) på veg inn til toppmøtet med Storbritannias statsminister Keir Starmer og andre europeiske leiarar, og Ukrainas president Volodymyr Zelenskyj. Foto: Javad Parsa / NTB / NPK